കാരന്തൂർ: കേരള മുസ്‌ലിം ജമാഅത്ത് 10-ാമത് സ്ഥാപക ദിനാചരണത്തിന്റെ ഭാഗമായി മർകസ് സെൻട്രൽ ക്യാമ്പസിൽ വിവിധ ആഘോഷ പരിപാടികൾ സംഘടിപ്പിച്ചു.  സാദാത്തുക്കളുടെയും പ്രാസ്ഥാനിക നേതാക്കളുടെയും സാന്നിധ്യത്തിൽ സമസ്ത ജനറൽ സെക്രട്ടറിയും കേരള മുസ്‌ലിം ജമാഅത്ത് പ്രസിഡന്റുമായ സുൽത്വാനുൽ ഉലമ കാന്തപുരം എ പി അബൂബക്കർ മുസ്‌ലിയാർ പതാകയുയർത്തലിന് നേതൃത്വം നൽകി. കേരള മുസ്‌ലിം ജമാഅത്ത് സംസ്ഥാന വൈസ് പ്രസിഡന്റ്  സി മുഹമ്മദ് ഫൈസി സന്ദേശ പ്രഭാഷണം നടത്തി. സമസ്ത വിഭാവനം ചെയ്യുന്ന ആദർശ ഭദ്രതയും സാംസ്കാരിക ഔന്നിത്യവും സമൂഹത്തിൽ പ്രചരിപ്പിക്കുന്നതിനും മുസ്‌ലിം സമൂഹത്തെ അതിനായി പ്രാപ്തമാക്കുന്നതിനും കേരള മുസ്‌ലിം ജമാഅത്തിന് സാധിച്ചിട്ടുണ്ടെന്നും ഭാവി പദ്ധതികളിൽ സുന്നി സമൂഹം ഉത്സാഹത്തോടെ പങ്കാളികളാവണമെന്നും അദ്ദേഹം പറഞ്ഞു. സയ്യിദ് അശ്‌റഫ് തങ്ങൾ ആദൂർ പ്രാർഥന നടത്തി. മർകസ് മുദരിസുമാരും പ്രാസ്ഥാനിക നേതാക്കളും ചടങ്ങിൽ സംബന്ധിച്ചു.