നോളജ് സിറ്റി : ശൈഖ് രിഫാഈ (റ) അനുസ്മരണവും ഹള്‌റയും വെള്ളിയാഴ്ച മര്‍കസ് നോളജ് സിറ്റിയിലെ ജാമിഉല്‍ ഫുതൂഹില്‍ നടക്കും.
വൈകിട്ട് 6ന് ആരംഭിക്കുന്ന സംഗമത്തില്‍ ഇബ്‌റാഹീം സഖാഫി താത്തൂര്‍ ശൈഖ് രിഫാഈ അനുസ്മരണ പ്രഭാഷണം നടത്തും. തുടര്‍ന്ന്, ദലാഇല്‍ ജല്‍സ, വിര്‍ദുല്ലത്വീഫ്, ഹള്റ തുടങ്ങിയവ നടക്കും. രോഗശമനം കൊണ്ട് ജനശ്രദ്ധ നേടിയ ഹള്റയില്‍ കേരളത്തിന്റെ വിവിധ ഭാഗങ്ങളില്‍ നിന്ന് നൂറ് കണക്കിന് വിശ്വാസികള്‍ സംബന്ധിക്കും. വിഖ്യാത ആത്മീയ സരണിയായ ഖാദിരിയ്യാ ത്വരീഖത്തിലെ ദിക്റുകളും ബൈത്തുകളും ക്രോഡീകരിച്ച ഖാദിരിയ്യ വിര്‍ദുകളാണ് ഹള്റയില്‍ പാരായണം ചെയ്യപ്പെടുന്നത്. മജ്‌ലിസിന് സയ്യിദ് ശാഫി ബാഅലവി വളപട്ടണം നേതൃത്വം നല്‍കും. പ്രത്യേകം സജ്ജമാക്കിയ മുസ്വല്ലല്‍ മുഅ്മിനാത്തില്‍ സ്ത്രീകള്‍ക്ക് സൗകര്യമൊരുക്കുന്നുണ്ട്. മജ്‌ലിസില്‍ വിര്‍ദുല്ലത്വീഫും ഹദ്ദാദ് റാത്തീബും തബറുക് വിതരണവും നടക്കും. സയ്യിദ് അബ്ദുര്‍റഹ്‌മാന്‍ ബാഫഖി, സയ്യിദ് ഹാശിം ജീലാനി, ആലിക്കുഞ്ഞി മുസ്‌ലിയാർ, ഹാഫിള് ശമീര്‍ അസ്ഹരി, ഹംസ മുസ്‌ലിയാർ, മുഹിയുദ്ദീന്‍ ബുഖാരി, സജീര്‍ ബുഖാരി, അഡ്വ. സുഹൈല്‍ സഖാഫി നല്ലളം തുടങ്ങിയവര്‍ സംബന്ധിക്കും.