തിരുവനന്തപുരം: കേരള സര്‍ക്കാര്‍ സാംസ്‌കാരിക വകുപ്പിന് കീഴില്‍ കലാകാരന്മാര്‍ക്ക് നല്‍കിവരുന്ന വജ്ര ജൂബിലി ഫെലോഷിപ്പിന് മലൈബാര്‍ ഫൗണ്ടേഷന്‍ ആര്‍ക്കൈവ് കോഡിനേറ്റര്‍ അഷ്‌റഫ് സഖാഫി പുന്നത്ത് അര്‍ഹനായി. മാപ്പിള കലാ മേഖലയില്‍ ഒന്നാം റാങ്കോടെയാണ് അഷ്‌റഫ് സഖാഫി ഫെലോഷിപ്പ് നേടിയത്. മാപ്പിളപ്പാട്ടിനെ കുറിച്ച് പഠിക്കുകയും ഗവേഷണം നടത്തുകയും 'മാപ്പിളപ്പാട്ട് നിയമങ്ങള്‍' എന്ന മാപ്പിളപ്പാട്ടിന്റെ ആദ്യ നിയമ പുസ്തകമടക്കം ഏഴ് ഗ്രന്ഥങ്ങള്‍ രചിക്കുകയും ചെയ്തിട്ടുണ്ട്. കൂടാതെ, 2022ല്‍ കേരള സര്‍ക്കാര്‍ സാംസ്‌കാരിക വകുപ്പിന് കീഴില്‍ നല്‍കുന്ന ഫോക്ലോര്‍ അക്കാദമി അവാര്‍ഡും ഇദ്ദേഹം നേടിയിരുന്നു.

ഗാനരചയിതാവും കാഥികനും ഗ്രന്ഥകാരനും മാപ്പിളപ്പാട്ട് ഗവേഷകനുമായ അഷ്‌റഫ് സഖാഫി ചരിത്ര പഠന ഗവേഷകര്‍ക്ക് ഒരു വഴികാട്ടിയാണ്. അറബി മലയാളത്തിലുള്ള അഞ്ഞൂറിലധികം ഗ്രന്ഥ ശേഖരങ്ങള്‍ ഉള്ള ഇദ്ദേഹം ഓള്‍ കേരള കിസ്സപ്പാട്ട് അസോസിയേഷന്‍ സംസ്ഥാന അക്കാദമിക് സെക്രട്ടറിയും നിലവില്‍ മര്‍കസ് നോളജ് സിറ്റിയിലെ മലൈബാര്‍ ഫൗണ്ടേഷനില്‍ ആര്‍ക്കൈവ് കോഡിനേറ്ററുമായിട്ടാണ് സേവനം ചെയ്യുന്നത്. സാഹിത്യ- ചരിത്ര- മാപ്പിളകല ചര്‍ച്ചകളിലെ സജീവ സാന്നിധ്യവും സാഹിത്യോത്സവ് ഉള്‍പ്പെടെയുള്ള മത്സരങ്ങള്‍ സ്ഥിരം വിധികര്‍ത്താവുമാണ്. ജേതാവിനെ മലൈബാര്‍ ഫൗണ്ടേഷന്‍ അനുമോദിച്ചു.
മലപ്പുറം ജില്ലയിലെ കരിപ്പൂര്‍ കുമ്മണിപ്പറമ്പ് വലക്കണ്ടിയില്‍ പെരിങ്കല്ലീരി അബൂബക്കര്‍ മുസ്ലിയാര്‍- നഫീസ ദമ്പതികളുടെ മകനാണ്. ഭാര്യ: ഫാത്വിമ നാജിയ. മക്കള്‍: സഹ്‌ല ബുഷ്‌റ, നഫീസ മുല്ല.