കാരന്തൂർ: ധാർമിക മൂല്യങ്ങളാണ് നല്ല കുടുംബങ്ങളെ സൃഷ്ടിക്കുന്നതെന്നും തലമുറ രൂപീകരണത്തിൽ സ്ത്രീകൾക്കുള്ള പങ്ക് പ്രധാനമാണെന്നും മർകസ് ജനറൽ സെക്രട്ടറി കാന്തപുരം എ പി അബൂബക്കർ മുസ്‌ലിയാർ. മർകസ് സെൻട്രൽ ക്യാമ്പസിലെ റെസിഡൻഷ്യൽ സ്ത്രീ വിദ്യാഭ്യാസ കേന്ദ്രമായ ജാസ്മിൻ വാലിയിലെ 30 വർഷത്തെ പൂർവ വിദ്യാർഥികൾ സംഗമിച്ച മെഗാ അലുംനി മീറ്റിൽ അനുഗ്രഹ പ്രഭാഷണം നടത്തുകയായിരുന്നു അദ്ദേഹം. തിരുനബി പത്നിമാരുടെയും മഹതികളുടെയും മാതൃകാ ജീവിതം അനുധാവനം ചെയ്താവണം ദൈനംദിന കാര്യങ്ങൾ ചിട്ടപ്പെടുത്തേണ്ടതെന്നും കൂടുതൽ നൈപുണികൾ ആർജിക്കുന്നത് വ്യക്തിത്വത്തെ ശക്തിപ്പെടുത്തുമെന്നും കാന്തപുരം ഉസ്താദ് പറഞ്ഞു. മർകസ് ഡയറക്ടർ ജനറൽ സി മുഹമ്മദ് ഫൈസി സംഗമത്തിൽ മുഖ്യപ്രഭാഷണം നടത്തി. ഡയറക്ടറും സെൻട്രൽ അലുംനി കമ്മിറ്റി പ്രസിഡന്റുമായ സി പി ഉബൈദുല്ല സഖാഫി അധ്യക്ഷത വഹിച്ചു. 

വിവിധ സംസ്ഥാനങ്ങളിൽ നിന്നുള്ള ആയിരത്തോളം പൂർവ വിദ്യാർഥികൾ  സംബന്ധിച്ചു. അലുംനി പാർലിമെന്റ്, ഹോണറിങ്, നൊസ്റ്റാൾജിയ, ബാച്ച് സംഗമങ്ങൾ, ഫാമിലി വെൽനെസ്, മർകസ് അനുഭവങ്ങൾ തുടങ്ങിയ വിവിധ സെഷനുകളിൽ വിഎം റശീദ് സഖാഫി, അക്ബർ ബാദുഷ സഖാഫി, സെൻട്രൽ അലുംനി സെക്രട്ടറി സ്വാദിഖ് കൽപ്പള്ളി, സി കെ മുഹമ്മദ് ഇരിങ്ങണ്ണൂർ, അബ്‌ദുറഹ്‌മാൻ കുറ്റിക്കാട്ടൂർ, ശഫീഖ് സഖാഫി ആവിലോറ, ഇസ്സുദ്ദീൻ സഖാഫി, ഡോ. സാറ ശരീഫ്, ഡോ. രിസാലത്ത് കെപി, നഫീസ, സലീമു പിപി വേങ്ങര, നുസ്രത്ത് ബീവി, അസ്മ റശീദ്, ആഇശ ബിൻത് അബ്ദുറഹ്മാൻ, നൂറ സുബൈർ സംസാരിച്ചു. പുതിയ സംഘടനാ വർഷത്തേക്കുള്ള ജാസ്മിൻ വാലി അലുംനി കമ്മിറ്റിയെ ചടങ്ങിൽ പ്രഖ്യാപിച്ചു.