കോഴിക്കോട്: സുന്നി വിദ്യാഭ്യാസ ബോർഡിന്റെ പത്താം തരം പൊതുപരീക്ഷയിൽ ഏറ്റവും മികച്ച ഫലം നേടിയ സ്‌കൂളുകൾക്ക് നൽകുന്ന 'എക്‌സലൻസി അവാർഡി'ന് കൈതപ്പൊയിൽ മർകസ് പബ്ലിക് സ്കൂൾ അർഹരായി. 2021 മുതൽ തുടർച്ചയായി അഞ്ചാം തവണയാണ് ഈ അഭിമാന നേട്ടം സ്കൂളിനെ തേടിയെത്തുന്നത്. 

മർകസ് സ്കൂളിൽ വ്യവസ്ഥാപിതമായി നിലനിൽക്കുന്ന മദ്‌റസ ഡിപ്പാർട്ട്‌മെന്റിന്റെ മികച്ച ഇടപെടലുകളുടെയും പാഠ്യപ്രവർത്തനങ്ങളുടെയും ഫലമാണ് തുടർച്ചയായ ഈ വൻനേട്ടം. 2025-26 അധ്യയന വർഷത്തെ പൊതുപരീക്ഷ എഴുതിയ എല്ലാ വിദ്യാർഥികളും എ പ്ലസ് നേടിയതിലൂടെയാണ് സ്കൂളിന് അവാർഡ് ലഭിച്ചത്. പരീക്ഷ എഴുതിയ 30 കുട്ടികളിൽ 22 പേരും ഫുൾ മാർക്ക് കരസ്ഥമാക്കി എന്നത് ഈ വിജയത്തിന്റെ തിളക്കം കൂട്ടുന്നു.

മികച്ച വിജയത്തിന് പിന്നിൽ പ്രവർത്തിച്ച സ്കൂൾ മാനേജ്‌മെന്റിനെയും അധ്യാപകരെയും വിദ്യാർഥികളെയും ജാമിഅ മർകസ്‌ ഫൗണ്ടർ ചാൻസിലർ കാന്തപുരം എ പി അബൂബക്കർ മുസ്‌ലിയാർ അഭിനന്ദിച്ചു. എക്‌സലൻസി അവാർഡ് സ്കൂൾ പ്രതിനിധികൾ ഉസ്താദിന് സമർപ്പിച്ചു. ചടങ്ങിൽ മർകസ് ഗ്രൂപ്പ് ഓഫ് സ്കൂൾസ് ചീഫ് അഡ്മിനിസ്‌ട്രേറ്റീവ് ഓഫീസർ വിഎം റഷീദ് സഖാഫി, അക്കാദമിക് ഡയറക്ടർ മുഹമ്മദ് ഷാഫി, കൈതപ്പൊയിൽ മർകസ് പബ്ലിക് സ്കൂൾ എ ഒ ജബ്ബാർ സഖാഫി, നാസർ ഹിശാമി, ഉബൈദ് നൂറാനി എന്നിവർ സംബന്ധിച്ചു.