കാരന്തൂർ: മാറിവരുന്ന തലമുറയെയും ജീവിത വ്യവഹാരങ്ങളെയും കുറിച്ച് മത പണ്ഡിതർക്ക് കൃത്യമായ അറിവും ബോധ്യവുമുണ്ടാകണമെന്ന് സമസ്ത കേരള ജംഇയ്യത്തുൽ ഉലമ ജനറൽ സെക്രട്ടറി കാന്തപുരം എപി അബൂബക്കർ മുസ്‌ലിയാർ. ജീവിക്കുന്ന ചുറ്റുപാടിനെ കുറിച്ച് വ്യക്തമായ ധാരണയുണ്ടായാൽ മാത്രമേ മത പ്രബോധന പ്രവർത്തനങ്ങളും ധാർമിക ബോധവത്കരണങ്ങളും ഫലം കാണുകയുള്ളൂ എന്നും ഉസ്താദ് പറഞ്ഞു. ജാമിഅ മർകസ് പൂർവവിദ്യാർഥി കൂട്ടായ്മയായ സഖാഫി സ്കോളേഴ്സ് കൗൺസിലിന് കീഴിൽ നടക്കുന്ന വാർഷിക ബാച്ച് കൗൺസിലുകൾക്ക് തുടക്കം കുറിച്ച് സംസാരിക്കുകയായിരുന്നു അദ്ദേഹം.

മർകസ് കാമിൽ ഇജ്തിമയിൽ നടന്ന ആദ്യ ബാച്ച് കൗൺസിലിൽ 1999, 2000 വർഷങ്ങളിൽ പഠനം പൂർത്തീകരിച്ച സഖാഫി പ്രതിനിധികളാണ്  പങ്കാളികളായത്. സംഗമം ജാമിഅ ചാൻസിലർ സി മുഹമ്മദ്‌ ഫൈസി ഉദ്ഘാടനം ചെയ്തു. മർകസ് വൈസ് പ്രസിഡന്റും സീനിയർ മുദരിസുമായ വിപിഎം ഫൈസി വില്ല്യാപ്പള്ളി അധ്യക്ഷത വഹിച്ചു. സഖാഫി ശൂറ ജനറൽ കൺവീനർ കുഞ്ഞി മുഹമ്മദ്‌ സഖാഫി പറവൂർ, സയ്യിദ് ജലാലുദ്ദീൻ ജീലാനി വൈലത്തൂർ, അബ്ദുൽ ലത്തീഫ് സഖാഫി പെരുമുഖം, സൈദ് സഖാഫി പറപ്പുർ,  ദുൽകിഫ്‌ലി സഖാഫി കാരന്തൂർ, അബ്ദുൽ ജലീൽ സഖാഫി കടലുണ്ടി, മുഹ്‌യിദ്ദീൻ സഖാഫി തളീക്കര തുടങ്ങിയവർ സംസാരിച്ചു. നാലു മാസം നീണ്ടു നിൽക്കുന്ന ബാച്ച് കൗൺസിലുകളിൽ 40 ബാച്ചുകളിലെ സഖാഫി പണ്ഡിത പ്രതിനിധികളാണ് സംബന്ധിക്കുക. വർഷാവസാനത്തിൽ സഖാഫി സ്കോളേഴ്സ് കൗൺസിൽ സെൻട്രൽ കൗൺസിലും സമ്പൂർണ സംഗമവും നടക്കും.