കോഴിക്കോട്: മർകസ് കോളേജ് ഓഫ് ശരീഅഃയിൽ നിന്നും പഠനം പൂർത്തിയാക്കിയ പണ്ഡിതരുടെ കൂട്ടായ്മയായ സഖാഫി ശൂറയുടെ ആഭിമുഖ്യത്തിൽ സംഘടിപ്പിച്ച 'ഇസ്നാദ്-23' സ്കോളേഴ്സ് സമ്മിറ്റിൽ പങ്കെടുക്കാൻ ഇത്തവണ പതിവിലും കൂടുതൽ സഖാഫികളെത്തി. അൽപകാലത്തെ വിശ്രമ ജീവിതത്തിനുശേഷം പൊതുവേദികളിൽ പ്രസാദത്തോടെ സാന്നിധ്യമറിയിച്ചുതുടങ്ങിയ തങ്ങളുടെ പ്രിയഗുരു കാന്തപുരം എപി അബൂബക്കർ മുസ്‌ലിയാരെ മനസ്സുനിറയെ കാണണമെന്നും ഉള്ളുനിറയെ കേൾക്കണമെന്നുമുള്ള ആഗ്രഹത്താൽ വിദൂര ദിക്കുകളിൽ നിന്നെത്തി അവർ ഒന്നിച്ചിരുന്നു. പ്രിയഗുരുവിന്റെ അർത്ഥഗർഭമായ സാരോപദേശങ്ങളും പ്രാർത്ഥനകളും കേട്ടും സഹപാഠികളെ കണ്ടും വിശേഷങ്ങൾ കൈമാറിയും മർകസ് നോളേജ് സിറ്റിയിലെ ജാമിഉൽ ഫുതൂഹിലെ ശാന്തസുന്ദരമായ അന്തരീക്ഷത്തിൽ അവർ ഏറെ നേരമിരുന്നു. ഒപ്പം പ്രമുഖരുടെ മൂല്യവത്തായ സെഷനുകൾക്കും സഖാഫി ശൂറയുടെയും വിവിധ ബാച്ചുകളുടെയും നേതൃത്വത്തിലുള്ള വിവിധ പദ്ധതികളുടെ പ്രകാശനത്തിനും അവർ സാക്ഷിയായി. ശിഷ്യരുടെ സ്നേഹവും സാന്നിധ്യവും ഉസ്താദിനും വളരെയധികം ഉന്മേഷവും ഊർജവും നൽകി. മർകസിന്റെ പ്രാരംഭകാലം മുതൽ അവസാന വർഷം പുറത്തിറങ്ങിയവരെയടക്കം ഒരുമിച്ചുകണ്ട സന്തോഷത്തിൽ ഉസ്താദ് കൂടുതൽ ആവേശത്തോടെ സംസാരിച്ചുതുടങ്ങി. ശിഷ്യർക്കുമാത്രം കരുതിവെച്ച ഉപദേശങ്ങളും പ്രാർത്ഥനകളും നൽകി അവരെ സത്കരിച്ചു. ഉള്ളിൽ സന്തോഷത്തിന്റെയും സഫലീകരണത്തിന്റെയും ഒരുപിടി നല്ലനിമിഷങ്ങൾ ശേഖരിച്ചാണ് ഇത്തവണ സ്കോളേഴ്സ് സമ്മിറ്റിൽ നിന്ന് ഓരോ പണ്ഡിതരും മടങ്ങിയത്.

മർകസിന്റെ ചരിത്രത്തിൽ ഇതാദ്യമായാണ് ഇത്രയേറെ പങ്കാളിത്തമുള്ള ഒരു സഖാഫി സംഗമം നടക്കുന്നത്. രണ്ടു ദിവസങ്ങളിലായി നടന്ന സമ്മിറ്റിൽ ഒമ്പതിനായിരത്തോളം പണ്ഡിതരാണ് ഒരുമിച്ചുകൂടിയത്. രണ്ടാം ദിവസമായ ശനിയാഴ്ച 2010 മുതൽ 2022 ബാച്ച് വരെയുള്ളവരാണ് സംഗമിച്ചത്. പേരോട് അബ്‌ദുറഹ്‌മാൻ സഖാഫി സമ്മിറ്റ്  ഉദ്ഘാടനം ചെയ്തു. വിപിഎം ഫൈസി വില്യാപ്പള്ളി അധ്യക്ഷത വഹിച്ചു. കാന്തപുരം എപി അബൂബക്കർ മുസ്‌ലിയാർ മുഖ്യപ്രഭാഷണം നടത്തി. സയ്യിദ് അലി ബാഫഖി തങ്ങൾ പ്രാർത്ഥനക്ക് നേതൃത്വം നൽകി. ചരിത്രം, കർമം, ജീവിതം, സന്ദേശം, പദ്ധതി തുടങ്ങിയ സെഷനുകളിൽ  സി മുഹമ്മദ് ഫൈസി, ഡോ. ഹുസൈൻ സഖാഫി ചുള്ളിക്കോട്, ഡോ. മുഹമ്മദ് അബ്ദുൽ ഹകീം അസ്‌ഹരി, ശാഫി സഖാഫി മുണ്ടമ്പ്ര, ഡോ. ഉമറുൽ ഫാറൂഖ് സഖാഫി കോട്ടുമല, സിപി ഉബൈദുല്ല സഖാഫി വിഷയമവതരിപ്പിച്ചു.

കെകെ അഹ്‌മദ്‌ കുട്ടി മുസ്‌ലിയാർ കട്ടിപ്പാറ, സയ്യിദ് ശറഫുദ്ദീൻ ജമലുല്ലൈലി, സയ്യിദ് ത്വാഹ സഖാഫി തളീക്കര, ചിയ്യൂർ മുഹമ്മദ് മുസ്‌ലിയാർ, എപി അബ്ദുൽ കരീം ഹാജി ചാലിയം, ബാദുശ സഖാഫി ആലപ്പുഴ, ഹസൻ സഖാഫി തറയിട്ടാൽ, ഇബ്‌റാഹീം സഖാഫി താത്തൂർ, കുഞ്ഞിമുഹമ്മദ് സഖാഫി പറവൂർ, ലത്തീഫ് സഖാഫി പെരുമുഖം, ദുൽകിഫിൽ സഖാഫി സംബന്ധിച്ചു.