Markaz Live

INTERNATIONAL MiLAD CONFERENCE

അന്താരാഷ്ട്ര മീലാദ് സമ്മേളനം: നിറം പകരാൻ ദഫ് ഘോഷയാത്ര

Markaz Live News

September 22, 2024
Updated

കോഴിക്കോട്: വരുന്ന ബുധനാഴ്ച കോഴിക്കോട് നടക്കുന്ന അന്താരാഷ്ട്ര മീലാദ് സമ്മേളനത്തിന് നിറം പകരാൻ നഗരത്തിൽ ദഫ് ഘോഷയാത്രയും. സമ്മേളനം ആരംഭിക്കുന്നതിന് മുമ്പ് റാലിയായി ദഫ് സംഘങ്ങൾ നഗരം ചുറ്റി നഗരിയിൽ സമാപിക്കുന്ന രീതിയിലാണ് ഘോഷയാത്ര നടക്കുക. സുന്നി ജംഇയ്യത്തുൽ മുഅല്ലിമീൻ കോഴിക്കോട് ജില്ലാ കമ്മിറ്റിയുടെ പങ്കാളിത്തത്തോടെ നടത്തുന്ന ദഫ് ഘോഷയാത്രയിൽ വിവിധ മേഖലകളിലെ മദ്‌റസകളിൽ നിന്നായി തിരഞ്ഞെടുക്കപ്പെട്ട 100 ലധികം സംഘങ്ങൾ ചുവടുവെക്കും. അറബ് ദഫ് ട്രൂപ്പുകളുടെ നേതൃത്വത്തിൽ സമ്മേളന വേദിയിലും അവതരണമുണ്ടാകും.

പരമ്പരാഗത ബൈത്തുകളുടെയും മദ്ഹ് ഗാനങ്ങളുടെയും അകമ്പടിയോടെ താളപ്പെരുക്കങ്ങൾ തീർത്ത് ഉയർ‌ന്നും താഴ്‌ന്നും ചെരിഞ്ഞും ചുവടുകൾ വെച്ചു ദഫ്‌മുട്ടി നീങ്ങുന്ന സംഘങ്ങൾ നഗരത്തിൽ സമ്മേളനത്തിന്റെ ഓളം സൃഷ്ടിക്കും. വ്യത്യസ്ത വസ്ത്രാലങ്കാരങ്ങളും വൈവിധ്യമാർന്ന പ്രകടനങ്ങളും ഘോഷയാത്രക്ക് മിഴിവേകും. ആദ്യം രജിസ്റ്റർ ചെയ്ത് തിരഞ്ഞെടുക്കപ്പെടുന്ന 100 സംഘങ്ങൾക്കാണ് ഘോഷയാത്രയിൽ പങ്കെടുക്കുന്നതിനും വിദേശ പ്രകീർത്തന സംഘങ്ങളും ദഫ് വിദഗ്ധരും ഒന്നിക്കുന്ന അന്താരാഷ്‌ട്ര മീലാദ് സമ്മേളനത്തിന്റെ ഭാഗമാകുന്നതിനും അവസരമുണ്ടാവുക. രജിസ്‌ട്രേഷനും കൂടുതൽ വിവരങ്ങൾക്കും 9995 590 178 എന്ന നമ്പറിൽ ബന്ധപ്പെടാവുന്നതാണ്.

മർകസിൽ നിന്നുള്ള തത്സമയ അപ്‌ഡേറ്റുകൾ വാട്സാപ്പിലൂടെ അറിയാം