കോഴിക്കോട്: ഈജിപ്ത് പ്രസിഡന്റ് അബ്ദുൽ അസ്സീസിയുടെ മേൽനോട്ടത്തിൽ കൈറോയിൽ നാളെ(ചൊവ്വ) ആരംഭിക്കുന്ന ദ്വിദിന ആഗോള ഫത്‌വാ സമ്മേളനത്തിൽ അബ്ദുല്ല സഖാഫി മലയമ്മ ഇന്ത്യയെ പ്രതിനിധീകരിക്കും. ഗ്രാൻഡ് മുഫ്തി കാന്തപുരം എ പി അബൂബക്കർ മുസ്‌ലിയാരുടെ പ്രതിനിധിയായാണ് ജാമിഅ മർകസ് കോളേജ് ഓഫ്  ഇസ്‌ലാമിക് തിയോളജി മേധാവിയും അറബ് മാധ്യമങ്ങളിലെ കോളമിസ്റ്റുമായ അബ്ദുല്ല സഖാഫി സമ്മേളനത്തിൽ സംബന്ധിക്കുന്നത്. ഇസ്‌ലാമിക ലോകത്തെ ഫത്‌വാ കേന്ദ്രങ്ങളെ ഏകോപിപ്പിക്കുന്ന  ജനറൽ സെക്രട്ടറിയേറ്റ് ഓഫ് ഫത്‌വ അതോറിറ്റീസ് വേൾഡ്‌വൈഡിന്റെ ആഭിമുഖ്യത്തിൽ  'ആർട്ടിഫിഷ്യൽ ഇന്റലിജൻസ് കാലത്തെ മുഫ്തിയുടെ ധർമം' എന്ന പ്രമേയത്തിൽ നടക്കുന്ന സമ്മേളനത്തിൽ 108 രാജ്യങ്ങളിൽ നിന്നുള്ള മുഫ്തിമാരും യൂണിവേഴ്‌സിറ്റി തലവന്മാരും പണ്ഡിതരും ഗവേഷകരും പങ്കെടുക്കും. ഫത്‌വ അതോറിറ്റിയിലെ സ്ഥിരം ക്ഷണിതാവാണ് ഇന്ത്യൻ ഗ്രാൻഡ് മുഫ്തി. 

'ആധുനിക മുഫ്തിയുടെ മാതൃക' എന്ന വിഷയത്തിൽ നാളെ വൈകുന്നേരം നടക്കുന്ന ചർച്ചയിൽ അബ്ദുല്ല സഖാഫി മോഡറേറ്ററാവും.  ഈജിപ്ത് മതകാര്യ വകുപ്പ് മന്ത്രി ഡോ. ഉസാമ അൽ അസ്ഹരി, ഗ്രാൻഡ് മുഫ്തി ഡോ. നാസിർ അയ്യദ്, ശൈഖുൽ അസ്ഹർ ഡോ. അഹ്‌മദ്‌ ത്വയ്യിബിന്റെ പ്രതിധിനി ഡോ. മുഹമ്മദ് ളുവൈനി, അൾജീരിയൻ മതകാര്യ വകുപ്പ് മന്ത്രി യൂസുഫ് ബെൽമെഹ്‌ദി, ഫലസ്തീൻ ചീഫ് ജഡ്ജ് മഹ്‌മൂദ്‌ അൽ ഹബാഷ്, ടുണീഷ്യൻ ഗ്രാൻഡ് മുഫ്തി ഹിശാം മഹ്‌മൂദ്‌, ജോർദാൻ മുഫ്തി അഹ്‌മദ്‌ അൽ ഹസനാത്, മലേഷ്യൻ മുഫ്തി ഫവാസ് അഹ്‌മദ്‌ ഫാളിൽ തുടങ്ങി പ്രമുഖർ വിഷയമവതരിപ്പിക്കും. നേരത്തെ യുഎഇ, സെനഗൽ, ജോർദാൻ, ഈജിപ്ത് തുടങ്ങിയ രാജ്യങ്ങളിൽ നടന്ന അന്താരാഷ്‌ട്ര സമ്മേളനങ്ങളിലും അബ്ദുല്ല സഖാഫി ഇന്ത്യയെ പ്രതിനിധീകരിച്ചിട്ടുണ്ട്.