കാരന്തൂർ: മർകസ് അനാഥ സംരക്ഷണ കേന്ദ്രമായ റൈഹാൻ വാലിയിലെ 11-ാമത് എഡിഷൻ ലൈഫ് ഫെസ്റ്റിവൽ യൂഫോറിയ ’26 ന്റെ ഭാഗമായി വിദ്യാർഥികൾക്കായി ‘സെൽഫ് പാലിയേറ്റീവ്’ പരിശീലന പരിപാടി സംഘടിപ്പിച്ചു. സാമൂഹികാവബോധവും സഹാനുഭൂതിയും ഉത്തരവാദിത്വബോധവും അപരനെ പരിഗണിക്കാനുള്ള മനസ്സും വിദ്യാർഥികളിൽ വളർത്തുന്നത് ലക്ഷ്യമിട്ടാണ് ശിൽപശാല നടത്തിയത്. രോഗികളെ പരിചരിക്കുന്നതിനും അവരുടെ വേദനയും ആവശ്യങ്ങളും മനസ്സിലാക്കി കരുതലോടെ ഇടപെടുന്നതിനുമുള്ള പ്രായോഗിക അനുഭവങ്ങൾ കുട്ടികൾക്ക് പകരുന്നതായിരുന്നു പരിപാടി. 

മർകസ് കെയർ ഹോംസ് ജോയിന്റ് ഡയറക്ടർ സി.പി സിറാജുദ്ദീൻ സഖാഫി പരിപാടി ഉദ്ഘാടനം ചെയ്തു. പ്രിൻസിപ്പൽ മുഹമ്മദ് സഈദ് ശാമിൽ ഇർഫാനി അധ്യക്ഷത വഹിച്ചു. പാലിയേറ്റീവ് വളണ്ടിയർ ആദിഷ് വെള്ളിപറമ്പ് ബോധവത്കരണവും പരിശീലനവും നടത്തി. ആശിഖ് സഖാഫി മാമ്പുഴ സ്വാഗതവും മാജിദ് സഖാഫി തച്ചണ്ണ നന്ദിയും പറഞ്ഞു.