ന്യൂഡൽഹി: കേന്ദ്ര സര്‍ക്കാറിന്റെ ആയുഷ് മന്ത്രാലയത്തിന് കീഴില്‍ പ്രവര്‍ത്തിക്കുന്ന സെന്‍ട്രല്‍ കൗണ്‍സില്‍ ഫോര്‍ റിസര്‍ച്ച് ഇന്‍ യുനാനി മെഡിസിന്‍ (സി സി ആര്‍ യു എം) സംഘടിപ്പിച്ച സ്റ്റുഡന്റ്‌സ്ഷിപ്പ് പ്രോഗ്രാം ഫോര്‍ യുനാനി റിസര്‍ച്ച് (എസ് പി യു ആര്‍) പദ്ധതി പൂര്‍ത്തീകരിച്ച് മര്‍കസ് യൂനാനി മെഡിക്കല്‍ കോളേജ് വിദ്യാര്‍ഥിനി ആലിയ സഫ്വാന കെ. രാജ്യത്താകമാനമായുള്ള ആയിരക്കണക്കിന് അപേക്ഷകളില്‍ നിന്ന് തെരഞ്ഞെടുക്കപ്പെട്ട 25 വിദ്യാര്‍ഥികളാണ് സ്റ്റുഡന്റ്‌സ്ഷിപ്പ് പ്രോഗ്രാമില്‍ പങ്കെടുത്തത്. 50,000 രൂപയുടെ ഗ്രാന്‍ഡ് ഉള്‍ക്കൊള്ളുന്നതാണ് സ്റ്റുഡന്റ്‌സ്ഷിപ്പ് പ്രോഗ്രാം. ഇക്കൂട്ടത്തില്‍ കേരളത്തില്‍ നിന്നുള്ള ഏക വിദ്യാര്‍ഥിയാണ് മര്‍കസ് യൂനാനി മെഡിക്കല്‍ കോളേജിലെ അവസാന വര്‍ഷ വിദ്യാര്‍ഥിനി ആലിയ സഫ്വാന.

'ഹിസ്റ്റോറിക്കല്‍ ഫൂട്പ്രിന്റ്‌സ് ഓഫ് യുനാനി മെഡിസിന്‍ ഇന്‍ കേരള; എ ഫോക്കസ് ഓണ്‍ മലബാര്‍സ് മെഡിക്കല്‍ ഹെറിറ്റേജ്' എന്ന ശീര്‍ഷകത്തിലാണ് ഗവേഷണ പദ്ധതി നടന്നത്. കേരളത്തില്‍, പ്രത്യേകിച്ച് മലബാര്‍ മേഖലയിലുമുള്ള യൂനാനി വൈദ്യശാസ്ത്രത്തിന്റെ പാരമ്പര്യവും 18, 19 നൂറ്റാണ്ടുകളിലെ സംഭാവനകളും സംബന്ധിച്ചതാണ് ഗവേഷണം നടത്തിയത്. മലൈബാര്‍ ഫൗണ്ടേഷന്റെ സഹകരണത്തോടെ മര്‍കസ് യുനാനി മെഡി. കോളജിലെ അസിസ്റ്റന്റ് പ്രൊഫസര്‍ ഡോ. അബ്ദുര്‍ റഷീദിന്റെ മാര്‍ഗനിര്‍ദേശ പ്രകാരമാണ് ഗവേഷണം പൂര്‍ത്തീകരിച്ചത്.

മണ്ണാര്‍ക്കാട് വാക്കടപ്പുറം സ്വദേശികളായ അബ്ദുല്‍ അസീസ് മാസ്റ്ററുടെയും ഷാഹിദയുടെയും മകളും അഡ്വ. അല്‍വാരിസ് അബ്ദുല്‍ മുബശിര്‍ ഖാദിരിയുടെ ഭാര്യയുമാണ് ആലിയ സഫ്വാന കെ.