നോളജ് സിറ്റി: 33-ാമത് കേരളാ സാഹിത്യോത്സവില്‍ മികച്ച പ്രകടനം കാഴ്ചവെച്ച് മർകസ് നോളജ് സിറ്റിയിലെ വിറാസ് വിദ്യാര്‍ഥികള്‍. വിവിധ കാറ്റഗറികളിലായി ആറ് മത്സരങ്ങളില്‍ ഒന്നാം സ്ഥാനവും ഏഴ് മത്സരങ്ങളില്‍ രണ്ടാം സ്ഥാനവും പത്ത് മൂന്നാം സ്ഥാനവുമാണ് അല്‍ വാരിസുകള്‍ കരസ്ഥമാക്കിയത്.

യു ജി മൂന്നാം വര്‍ഷ വിദ്യാര്‍ഥി അഹമ്മദ് കബീര്‍ ക്യാമ്പസ് വിഭാഗത്തില്‍ ഇ പോസ്റ്റര്‍, ബുക് ടൈല്‍ എന്നിവയില്‍ ഒന്നാം സ്ഥാനവും ഇംഗ്ലീഷ് പ്രസംഗത്തില്‍ രണ്ടാം സ്ഥാനവും നേടി. പി ജി രണ്ടാം വര്‍ഷ വിദ്യാര്‍ഥിയായ മുഹമ്മദ് അല്‍ത്വാഫ് ജനറല്‍ സോഷ്യല്‍ സ്‌റ്റോറിയിലെ ഒന്നാം സ്ഥാനത്തിന് പുറമെ സീനിയര്‍ മലയാള പ്രബന്ധത്തില്‍ മൂന്നാം സ്ഥാനവും നേടി. പി ജി ഒന്നാം വര്‍ഷ വിദ്യാര്‍ഥി സിറാജുല്‍ അന്‍വര്‍ സീനിയര്‍ ഉര്‍ദു പ്രഭാഷണത്തില്‍ ഒന്നാം സ്ഥാനം നേടി. കൂടാതെ, സിറാജുല്‍ അന്‍വര്‍ നയിച്ച സംഘത്തിനാണ് ജനറല്‍ ഖവാലിയില്‍ മൂന്നാം സ്ഥാനം ലഭിച്ചത്. യു ജി നാലാം വര്‍ഷ വിദ്യാര്‍ഥികളായ മുഹമ്മദ് നസീം ജനറല്‍ കൊളാഷിലും മുഹമ്മദ് റാസി ക്യാമ്പസ് ഇംഗ്ലീഷ് കവിതാ രചനയിലും ഒന്നാം സ്ഥാനം കരസ്ഥമാക്കി.

ക്യാമ്പസ് കവിതാ രചനയില്‍ രണ്ടാം സ്ഥാനം നേടിയ സ്വഫ്‌വാൻ മൂസ ഉള്‍ക്കൊള്ളുന്ന ടീമാണ് ക്യാമ്പസ് മാഗസിന്‍ മത്സരത്തിലെ മൂന്നാം സ്ഥാനക്കാര്‍. അബ്ദുര്‍റഹീം, അനീസ്, ശഹ്ദാന്‍ സനീന്‍ എന്നിവരാണ് ക്യാമ്പസ് മാഗസിന്‍ മത്സരത്തിലെ മറ്റു ടീമംഗങ്ങള്‍. മര്‍കസ് ലോ കോളജ് ക്യാമ്പസിനെ പ്രതിനിധീകരിച്ചാണ് ഇവര്‍ മത്സരിച്ച് വിജയം കൊയ്തത്.

സീനിയര്‍ ഇംഗ്ലീഷ് പ്രബന്ധത്തില്‍ മാജിദ് അഫ്ഹം, ജൂനിയര്‍ അറബി പ്രസംഗത്തില്‍ ഹുസൈന്‍ കബീര്‍, ക്യാമ്പസ് മദ്ഹ് ഗാനത്തില്‍ മുഹമ്മദ് ബിശ്ര്‍ വി, ജൂനിയര്‍ മലയാളം പ്രബന്ധത്തില്‍ സയ്യിദ് ബിശ്ര്‍ എന്നിവരാണ് രണ്ടാം സ്ഥാനം നേടിയത്.

സീനിയര്‍ പോഡ്കാസ്റ്റ് മത്സരത്തില്‍ രണ്ടാം സ്ഥാനം നേടിയ സംഘത്തിലെ വാസില്‍ ശമീറും മൂന്നാം സ്ഥാനം നേടിയ മുഹമ്മദ് ഫര്‍ഹാനും വിറാസ് വിദ്യാര്‍ഥികളാണ്. ജൂനിയര്‍ പോഡ്കാസ്റ്റില്‍ മൂന്നാമതെത്തിയ മുഹമ്മദ് ഹംദാനും വിറാസ് വിദ്യാര്‍ഥി തന്നെയാണ്.

കൂടാതെ, സീനിയര്‍ ഇംഗ്ലീഷ് പ്രസംഗത്തില്‍ ഹിബത്തുല്ല, ക്യാമ്പസ് മലയാളം കവിത രചനയില്‍ ഉവൈസ് യാസീന്‍ എന്നിവര്‍ മൂന്നാം സ്ഥാനം നേടിയും വിറാസിന്റെ അഭിമാനമായി.

മികച്ച വിജയം നേടിയ വിദ്യാര്‍ഥികളെ വിറാസ് ഡീന്‍ പൊന്‍മള അബ്ദുല്‍ ഖാദര്‍ മുസ്ലിയാര്‍, റെക്ടര്‍ ഡോ. മുഹമ്മദ് അബ്ദുല്‍ ഹക്കീം അസ്ഹരി, അക്കാദമിക് കൗണ്‍സില്‍, സ്റ്റുഡന്റ്‌സ് യൂണിയന്‍ അഭിനന്ദിച്ചു.