പ്രൗഢമായി ഓർഫൻ ഹോം കെയർ ഫണ്ട് വിതരണം; മലപ്പുറത്ത് നടന്ന ചടങ്ങില്‍ കൈമാറിയത്‌ 19.6 കോടി
Markaz Live News
October 29, 2018
Updated
"
മലപ്പുറം: കാരന്തൂർ മർകസിന്റെ കീഴിൽ അനാഥരെ ഏറ്റെടുത്ത് വീടുകളിലേക്ക് ചെലവ് എത്തിക്കുന്ന ഓർഫൻ കെയർ പദ്ധതിയുടെ വാർഷിക ഫണ്ട് വിതരണ ഉദ്‌ഘാടനം മലപ്പുറം മഅദിൻ അക്കാദമിയിൽ നടന്നു. രാജ്യത്തിന്റെ വിവിധ ഭാഗങ്ങളിൽ നിന്നുള്ള പിതാക്കൾ മരണപ്പെട്ട 4844 വിദ്യാർത്ഥികളുടെ ഒരു വർഷത്തെ വിദ്യാഭ്യാസം, ഭക്ഷണം, വസ്ത്രം, മെഡിസിൻ, പരിശീലനം തുടങ്ങിയ ചെലവുകൾക്ക് ആവശ്യമായ 19.6 കോടി രൂപയുടെ ചെക്ക് ചടങ്ങിൽ എ.പി അനിൽ കുമാർ എം.എൽ.എ വിദ്യാർത്ഥികൾക്ക് കൈമാറി. മർകസ് ഡയറക്ടർ ഡോ. എ.പി അബ്ദുൽ ഹകീം അസ്ഹരി അധ്യക്ഷത വഹിച്ചു.
അനാഥകളായ വിദ്യാർത്ഥികളെ വീടുകളിൽ തന്നെ താമസിപ്പിച്ചു ഉന്നതമേഖലകളിലേക്ക് വളർത്തിക്കൊണ്ടുവരുന്ന പദ്ധതിയാണിത്. മലപ്പുറം ജില്ലയിൽ മാത്രം 879 വിദ്യാർഥികൾ ഈ പദ്ധതിക്ക് കീഴിൽ നിലവിലുണ്ട്. ആവശ്യമായ പണം നൽകുന്നതോടൊപ്പം കൃത്യമായ ഇടവേളകളിൽ ഇവരെയും മാതാക്കളെയും ഒരുമിപ്പിച്ചു വിദ്യാഭ്യാസ- മാനശാസ്ത്ര ക്ളാസുകൾ നൽകുകയും ചെയ്യുന്നു. പതിനാറു വർഷം മുമ്പ് തുടങ്ങിയ ഈ പദ്ധതിയിലൂടെ വിദ്യാഭ്യാസവും ഭാവിയെക്കുറിച്ചുള്ള കാഴ്ചപ്പാടുകളും നേടിയ നൂറുകണക്കിന് പേര് ഇപ്പോൾ ഉന്നത വിദ്യാഭ്യാസ പഠന രംഗത്ത് വ്യവഹരിക്കുന്നു.
ഗവൺമെന്റുകൾ നടത്തുന്നത് പോലുള്ള സാമൂഹിക മുന്നേറ്റ യത്നങ്ങൾ ആണ് കാന്തപുരം എ.പി അബൂബക്കർ മുസ്‌ലിയാരുടെ കീഴിൽ മർകസ് രാജ്യത്താകെ നടത്തുന്നത് എന്ന് എ.പി അനിൽ കുമാർ എം.എൽ.എ ഉദ്‌ഘാടന പ്രസംഗത്തിൽ പറഞ്ഞു. 40000 വിദ്യാർത്ഥികൾക്ക് അക്കാദമിക അറിവ് നൽകുന്നതോടൊപ്പം ജീവകാരുണ്യ രംഗത്ത് നടത്തുന്ന അസാധാരണമായ ഇടപെടലുകൾ ഏറെ പ്രശംസനീയവും മാതൃകാപരവുമാണെന്നു അദ്ദേഹം അഭിപ്രായപ്പെട്ടു.
പിതാവ് നഷ്ടപ്പെട്ടത്തിന്റെ മാനസിക വേദനയും, സാമ്പത്തിക പ്രയാസങ്ങളും അനുഭവിക്കുന്ന അനാഥകളെ ഏറ്റെടുത്ത്, വീടുകളിൽ തന്നെ താമസിപ്പിച്ചു നടത്തുന്ന ഓർഫൻ ഹോം കെയർ പദ്ധതി ലക്ഷ്യമാക്കുന്നത് എല്ലാവരെയും വൈജ്ഞാനികമായും സാമൂഹികമായും ഉയർത്തുകയെന്നതാണെന്ന് മർകസ് ഡയറക്ടർ ഡോ. എ.പി അബ്ദുൽ ഹകീം അസ്ഹരി പറഞ്ഞു. കൃത്യമായ പരിശീലനവും വിജ്ഞാനവും നൽകിയാൽ ഓരോ വിദ്യാർഥികളെയും അവർക്ക് അഭിരുചിയുള്ള മേഖലകളിൽ ഉന്നതരാക്കാൻ സാധിക്കും. അതാണ് മർകസും മഅദിൻ അക്കാദമിയും പോലുള്ള സ്ഥാപനങ്ങൾ നിർവ്വഹിക്കുന്നതെന്നും അദ്ദേഹം പറഞ്ഞു. ആയിരത്തിലധികം അനാഥ വിദ്യാർത്ഥികളും രക്ഷിതാക്കളും പങ്കെടുത്തു.
മർകസ് റിലീഫ് സെൽ റീജിണൽ മാനേജർ റശീദ് പുന്നശ്ശേരി, മഅദിൻ അക്കാദമിക ഡയറക്ടർ നൗഫൽ കോഡൂർ, മർസൂഖ് സഅദി, ദുൽഫുഖാർ സഖാഫി, ഉമർ മേൽമുറി, മുസ്തഫ വേങ്ങര, ശറഫുദ്ധീൻ കൊളപ്പുറം എന്നിവർ ചടങ്ങിൽ പ്രസംഗിച്ചു. യൂസുഫ് നൂറാനി സ്വാഗതവും സയ്യിദ് ശിഹാബ് തങ്ങൾ നന്ദിയും പറഞ്ഞു.
മർകസിൽ നിന്നുള്ള തത്സമയ അപ്ഡേറ്റുകൾ വാട്സാപ്പിലൂടെ അറിയാം
